Wem gelten Warnungen und gute Ratschläge?

Zusammenfassung

Belle leçon aux enfants perdus (T, v. 1668–1691)

»Beaulx enfans, vous perdez la plus

Belle rose de vo chappeau;

Mes clers pres prenans comme glus,

Se vous allez a Montpipeau

Ou a Rueil, gardez la peau:

Car, pour s’esbatre en ces deux lieux,

Cuidant que vaulsist le rappeau,

Le perdit Colin de Cayeux.

»Ce n’est pas ung jeu de trois mailles,

Ou va corps, et peut estre l’ame.

Qui pert, riens n’y sont repentailles

Qu’on n’en meure a honte et diffame;

Et qui gaigne n’a pas a femme

Dido la royne de Cartage.

L’homme est donc bien fol et infame

Qui, pour si peu, couche tel gage.

»Qu’ung chascun encore m’escoute!

On dit, et il est verité,

Que charterie se boit toute,

Au feu l’yver, au bois l’esté:

S’argent avez, il n’est enté,

Mais le despendez tost et viste.

Qui en voyez vous herité?

Jamais mal acquest ne prouffite.